بسم الله الرحمن الرحيم
السلام عليكم أخوانى الكرام
هذا موضوع عن لقائى شخصيا مع محضر أرواح كما يدعى
اولا هو مسلم كما رأيت والله أعلم حيث انه يذكر الله كثيرا
وبعد بالطبع لما عرفت انه بيقول انه بيحضر أرواح وطبعا ما فيش حاجه اسمها تحضير ارواح
ده يا أخوانى والله أعلم بيبقى جنى بيدعى انه روح فلان كما قرأت فى الكتب
بيقول انه بيقدر يعرف اذا كان الواحد عنده فى أرضه كنز مدفون ولا لأ او اى حاجه ضايعه منه
وطبعا بيعمل للناس أعمال وحاجات من دى كتير...
قلت له يا ترى اللى انت بتحضره ده جن سفلى ولا علوى .. رد عليا وقالى طبعا علوى
يعنى جنى مسلم... طبعا كان جوايا سؤال هوه أنت ايه اللى عرفك انه مسلم؟ ممكن يكون بيكدب عليك ... قالى الجنى ده بحضره عن طريق بعض الكلمات (التعاويذ) وبخور جاوى وهو أشهر انواع البخور ومبيظهرش الا فى الأماكن العاديه النظيفه ...
اما السفلى فهو من أخطر الانواع أذيه وشر ولا يظهر الا فى الأماكن النجسه والمهجوره ولا يحضر الا على نجاسه والعياذ بالله ولما بيحضر بيبهدل الدنيا
قلت له ازاى؟ قالى بي**ر البيت ويولع الدنيا ويؤذى الناس ولازم يغدر بيك وبالناس اللى حواليك
ومبينصرفش بسهوله وللأسف بيرجع تانى ولو وجدك أقوى منه بيروح يجبلك الأقوى منه يعنى بأختصار مش هيسيبك ...
قلت له أيه أخطر المواقف اللى حصلت لك؟
قالى فى واحد كان فى منطقه ما من مدن مصر وطبعا بدون ذكر أسماء كان عنده أراضى كتيره
جدا وممتده الى جبل كبير فطبعا أتصل بى وقالى تعالى أكشف لنا فى حاجات هنا ثمينه ولا لأ
قلت له طيب ورحت... ولاقيت فى ناس كتير من اللى شغالين معاه عاملين فتحات كتيره فى الجبل وبعدين لفت نظرى فتحه غريبه شويه عن الباقى فدخلت فيها ومعايا بعض الناس
لاقيت باب من الحجر على شكل مربع فكتبت عيه الكلام اللى يفتحه وبعد شويه أتقلب الحجر
ليقسم المدخل الى نصفين أعلى وأسفل فدخلت من الأسفل زاحفا انا والناس اللى معايا
وبعد ما دخلنا قعدت ازحف شويه وكل شويه سقف الحجره يعلى ويعلى حتى أصبحت أستطيع المشى ووصلت لحجره كبيره انا والناس اللى معايا وفجأه سمعت انا والناس صوت ضخم جدا
وبيقول انتم خلاص مش هتطلعوا من هنا تانى وأفتكرت انى انا اللى سمعت لوحدى ولكن الناس سمعت الصوت معايا وفجأه سمعنا صوت الحجر أتقفل علينا يعنى مافيش خروج
وقعدت أقرأ قرأن وأقرا التعاويذ وأحاول انى اطلع انا واللى معايا ولكن لا حياة فيمن تنادى
وفجأة سمعت صوت بيقولى أنا ممكن أخرجكم من هنا بشرط انك تقول للناس اللى بره مافيش
حاجه هنا وأمشوا قلت له طبعا حاضر وطلعنا نجرى لقينا الحجر بيتفتح شويه وزحفنا لبره
بسرعه وانا طالع كان الحجر بيقفل وكان هيقفل على رجلى لولا ستر ربنا كان قطمنى نصفين
وطبعا مكنتش مصدق نفسى انى طلعت منها حى ...
ودى من احدى القصص اللى سمعتها منه وصحابه أكدوهالى
وأخيرا مش هطول عليكم وابقى أقولكم الباقى فى مواضيع أخرى
وعلى فكرة أقسم بالله انى لم أختلق هذه القصه فهى منه شخصيا
وان شاء الله هبقى أقولكم لما قرألى الكف وورانى صور لحاجات قيمة وتماثيل بيقول أنة هوة اللى طلعها وحكالى قصص تانية برضة غريبة ومن جوايا مش مصدقها . وعندى كمان قصة أو أتنين
لو انتم حبيتم انى أكتبهالكم .... السؤال بقى لأخوانى الأفاضل هل فعلا كلام الراجل دة ممكن
يكون بجد ؟ لأنى من جوايا حاسس أن الراجل دة دجال وبيتكلم أى كلام ؟ وأخيرا أسف على الأطالة
أخوكم فى الله sleam911
المزاج
الثلاثاء مايو 19, 2009 6:34 pm
